Lumabas na ang pinakahinihintay na official trailer ng bagong TV remake ng Darna mula sa ABS-CBN na pinagbibidahan ni Jane De Leon.
Inaabangan at tinututukan ng madlang pipol ang kauna-unahang full trailer ng Darna kaya pinag-uusapan ito ngayon sa social media.
Makikita sa nasabing trailer, si Iza Calzado bilang si Darna na nakikipaglaban sa mga kaaway mula sa ibang planeta na sumalakay sa mundo upang agawin sa kanya ang mahiwagang bato. Kasunod nito, ay ipinagtapat ni Iza kay Jane, bilang Narda na siya na ang susunod na magiging tagapag-alaga ng bato at kailangan niya itong paghandaan upang mailigtas niya ang buong mundo.
Ipinakita rin ang pagsugo ni Iza sa mahiwagang bato. Ngunit binitin naman ang mga manonood dahil hindi ipinakita si Jane na nakasuot sa costume ni Darna.
Matapos inilabas ang nasabing trailer, agad itong umani ng mga positibong komento mula sa mga netizens. Mukhang magiging hit ang nasabing palabas dahil ngayon pa lamang ay trending na, dahil sa graphics, cinematography at sound effects na hindi umano nagpapahuli sa Hollywood.
Samantala, wala pa namang ipinapalabas na petsa kung kailan ito magsisimulang mapapanood sa TV.
Walang komento
Mag-post ng isang Komento
Share your opinion now!