Kilalanin Ang Pinoy Na Si Sofronio Vasquez, The Voice Us Season 26 Winner

 Ang Filipino pride na si Sofronio Vasquez ay tinanghal na kampeon sa The Voice USA Season 26 mula sa koponan ni Michael Bublé. Mula sa kanyang pagsali sa Tawag ng Tanghalan hanggang sa The Voice USA, patuloy niyang pinapalakas ang pangalan ng Pilipinas at ipinagmamalaki ang talento ng mga Pilipino sa buong mundo.

Kilalang-kilala si Sofronio dahil sa kanyang malakas na boses at velvet-like na tono, isang mang-aawit na kayang magtagumpay sa iba’t ibang genre ng musika, mula pop, RnB, rock, jazz, standard, at maging sa rap. Mula pa noong bata siya, ipinakita na ni Sofronio ang kanyang kahusayan sa musika.

Isa si Sofronio sa mga finalist ng Tawag ng Tanghalan noong 2019, kung saan siya ang nagwagi ng ikatlong pwesto sa huling pagsalang. Sa panahon ng kanyang paglahok sa kompetisyon, nakapagtala siya ng anim na magkakasunod na pagkapanalo, isang tagumpay na nagpatibay sa kanyang pangalan sa industriya ng musika. Kasama rin siya sa TNT All-Star Grand Resbak, isang pambansang paligsahan ng mga magagaling na mang-aawit. 

Bukod sa mga tagumpay sa mga lokal na kompetisyon, nakamit ni Sofronio ang Kumu Diamond Award noong 2021, isang patunay ng kanyang pagiging influencial at popular sa platform na Kumu.

Hindi lang sa Kumu naroroon ang kanyang mga tagasuporta. Sa mga social media platforms tulad ng TikTok, YouTube, Facebook, at Instagram, milyun-milyong netizens ang sumusubaybay sa kanyang mga cover songs. Kabilang sa mga pinakapopular na cover ng mga awitin ni Sofronio ay ang kanyang bersyon ng "That’s What Friends Are For," na umabot sa higit 9 milyong views sa Facebook, at "Nothing’s Gonna Change My Love for You," na tinangkilik din ng isang milyong viewers sa TikTok.

Hindi lang sa mga cover songs ang kanyang tagumpay, kundi pati na rin sa paggawa ng orihinal na mga kanta. Noong 2020, inilabas ni Sofronio ang kantang Bakit Hindi Ko Sinabi sa ilalim ng Old School Records ng ABS-CBN Music. Kasunod nito, ang kanyang mga awitin tulad ng Bililhon at Mahalaga na inilabas naman noong 2022 sa Normal Use Records. Pinatunayan niyang may kakayahan din siyang magsulat at mag-compose ng kanyang sariling musika, hindi lang mag-perform.

Ang pinakabagong tagumpay ni Sofronio ay ang kanyang pagpasok sa Top 5 ng The Voice USA. Noong Setyembre ng nakaraang taon, sumalang siya sa blind audition kung saan nakakuha siya ng apat na chair turns mula sa mga coach na sina Snoop Dogg, Michael Bublé, Reba McEntire, at Gwen Stefani. Matapos niyang kantahin ang "I’m Goin’ Down" ni Mary J. Blige, tumanggap siya ng standing ovation at mga papuri mula sa mga coach. 

Ayon kay McEntire, ang boses ni Sofronio ay parang mantikilya, malambot at puno ng emosyon, samantalang sinabi naman ni Stefani na ang kanyang performance ay may katangiang Grammy-level. Si Michael Bublé naman ay nagpasalamat kay Sofronio at inilahad na ang relasyon niya sa Pilipinas ay lalo pang nagpataas ng kanyang paghanga kay Sofronio, habang si Snoop Dogg ay binigyang-diin ang potensyal ni Sofronio bilang isang soulful artist.

Patuloy na nagbigay ng malalakas na performances si Sofronio, kabilang ang kanyang mga awit na “Unstoppable” ni Sia at “A Million Dreams” mula sa pelikulang The Greatest Showman. Dahil sa mga outstanding performances na ito at sa suportang natamo mula sa mga online votes ng mga Pinoy netizens, siya ay itinanghal na The Voice USA Season 26 Winner ngayong 2024.

Sa bawat awit na kanyang isinasagawa, pinapalakas ni Sofronio Vasquez ang pagmamahal sa musika at patuloy na ipinapakita sa mundo ang galing ng mga Pilipino. Ang kanyang kwento ay isang patunay ng talento, dedikasyon, at pagmamalaki sa sariling sining, na nagsisilbing inspirasyon sa lahat ng mga Pilipinong nagnanais na maabot ang kanilang mga pangarap sa larangan ng musika.