Kiray Celis Ibinandera Ang Kanyang Mga Naipundar Ngayong 2024

 Buong saya at kagalakan na ibinahagi ng komedyanteng si Kiray Celis ang ilan sa kanyang mga natamo at naipundar na mga ari-arian ngayong taon. Sa isang Instagram post, ipinakita ni Kiray ang mga larawan ng kanyang mga naipatayong rental properties at inilahad ang kanyang mga karanasan sa pag-iipon at pamumuhunan.

Ayon kay Kiray, ang taon ng 2024 ay nakatuon sa matalinong pag-iipon at paggastos. Ibinahagi niya, "2024 is all about smart saving and smart spending para sa akin." Nilakipan niya ito ng mga larawan ng mga paupahan na siya mismo ang nagpatayo.

Paliwanag ni Kiray, nag-ipon siya ng sapat na halaga upang makapag-invest sa mga paupahan at natutunan niya ang kahalagahan ng pagpili ng tamang mga tao para sa negosyo at pagpapahalaga sa mga bagay na talagang kailangan, imbes na puro luho. 

Aniya, "Nag-ipon ako para sa mga paupahan and learned the importance ng choosing the right people and prioritizing needs over wants."

Ngunit hindi lang sa mga negosyo nagtuon ng pansin si Kiray. Sinabi rin niyang hindi niya nakalimutan ang kanyang sarili at ang pagpapahalaga sa sariling kalusugan at kaligayahan.

"After all the hustle, nirereward ko lang ang sarili ko. May konting byahe, tour o pahinga sa ibang bansa!" saad ni Kiray sa kanyang post.

Ilan sa mga paglalakbay na binanggit ni Kiray ay kasama niya ang kanyang boyfriend na si Stephan Estopia. Kamakailan lamang, ipinagdiwang ng magkasintahan ang kanilang ikalimang anibersaryo. Sa kabila ng lahat ng kanilang pinagdaanan, ipinahayag ni Kiray ang kanyang pasasalamat kay Stephan sa pamamagitan ng isang touching na mensahe sa Instagram.

“Salamat sa lahat ng pagmamahal mo sakin at sa pamilya ko. Sa pagsakay mo sa lahat ng trip ko, sa pagsuporta sa lahat ng gusto ko. Sa pagdadrive sakin sa lahat ng work ko. Sa lahat ng toyo ko, sa mga pagiinarte, pagmamaldita at pag susuplada ko sayo. LAHAT LAHAT…wala nakong mahihiling pa kasi nasakin ka na. Mahal na mahal kita!” ang wagas na mensahe ni Kiray para kay Stephan, na puno ng pasasalamat at pagmamahal.

Sa kabila ng kanyang pagiging abala sa kanyang mga proyekto at negosyo, hindi pa rin nakalimutan ni Kiray ang mga bagay na tunay na mahalaga sa kanya, tulad ng pagpapahalaga sa sarili at sa mga taong nagsusuporta sa kanya, tulad ng kanyang pamilya at si Stephan. Ang mga hakbang na ginawa ni Kiray sa pagpapundar ng mga ari-arian at ang kanyang malasakit sa personal na kaligayahan ay nagsisilbing inspirasyon para sa iba na magsikap at mag-ipon para sa kanilang kinabukasan, habang hindi nakakalimutang pahalagahan ang mga simpleng kaligayahan sa buhay.