ABS-CBN Hindi Aware Sa Ginawa Ni Salcedo Pero Thankful Pa Rin

Nagbigay ng opisyal na pahayag ang ABS-CBN Network ukol sa balitang naghain ng isang house bill si Albay Representative Joey Salceda na naglalayong bigyan muli ng prangkisa ang Kapamilya network. Ayon sa pahayag ng ABS-CBN na ipinalabas sa kanilang news outlet, hindi sila pamilyar sa House Bill na ito, ngunit ipinahayag nila ang kanilang taos-pusong pasasalamat kay Salceda sa kanyang suporta at pagtangkilik sa kontribusyon ng kanilang estasyon sa publiko.

"While we were not aware of Rep. Joey Salceda's filing of a bill to grant a broadcast franchise to ABS-CBN today, we are deeply grateful for his support and belief in ABS-CBN's contributions and mission to serve the Filipino public," wika ng Kapamilya network.

Tiniyak din nila ang kanilang pagpapahalaga sa limang iba pang mambabatas na naghain ng katulad na mga panukalang batas bago pa man si Salceda. Ang mga ito ay sina Rep. Gabriel Bordado Jr., Arlene Brosas, France Castro, Raoul Manuel, Johnny Pimentel, at Rufus Rodriguez. Pinuri ng ABS-CBN ang kanilang mga kasamahan sa Kongreso na nakikita ang kahalagahan ng pagbabalik ng kanilang operasyon sa pamamagitan ng isang bagong prangkisa.

Ang nasabing house bill, na ipinasa ni Salceda noong Martes, Enero 7, ay tinawag na House Bill No. 11252, na may pamagat na "An Act Granting The ABS-CBN Corporation (Formerly ABS-CBN Broadcasting Corporation) A Franchise To Construct, Install, Operate, and Maintain Television and Radio Broadcasting Stations In The Philippines, And Other Purposes." 

Binanggit sa bill na ang Securities and Exchange Commission (SEC) at ang Bureau of Internal Revenue (BIR) ay nagsagawa ng mga deliberasyon at nagpahayag na walang nilabag na mga batas hinggil sa pag-aari at wala ring anumang isyu sa hindi pagbabayad ng buwis ang ABS-CBN.

Ayon sa bill, ang pagkawala ng prangkisa ng ABS-CBN noong 2020 ay naging sanhi ng pagkawala ng trabaho ng halos 11,000 empleyado, na naganap pa sa gitna ng pandemya ng COVID-19. Isa pa sa mga benepisyo na binanggit ay ang malawak na abot ng ABS-CBN sa mga rehiyon, kung saan nakatutulong ang kanilang mga programa sa pagbabalita at pagbibigay ng mga updates, lalo na sa mga oras ng kalamidad. Ang mga impormasyong ito ay mahalaga sa mga estratehiya ng lokal na pamahalaan para sa disaster risk management.

"Given the merits of renewing the franchise, as well as the clarifications made by government agencies over certain allegations against the grantee, this representation urges Congress to reconsider the non-renewal of the franchise by the previous Congress,"  bahagi ng House Bill.

Sa kabila ng mga pahayag ukol sa posibleng pagbabalik ng ABS-CBN sa ere, binigyang-diin ni ABS-CBN President Carlo Katigbak sa mga nakaraang panayam na hindi ang pagbabalik ng prangkisa ang tinitingnan nilang layunin ngayon, kundi ang pagiging isang content provider. Aniya, layunin ng kumpanya na magpatuloy sa paggawa ng de-kalidad na mga programa at serbisyo para sa kanilang mga tagapanood, hindi lamang sa telebisyon, kundi pati na rin sa iba't ibang digital platforms.

Pinayuhan din ni Katigbak ang publiko na hindi sila umaasa lamang sa tradisyunal na prangkisa, kundi mas inuukit nila ang kanilang landas sa industriya ng media at content creation sa pamamagitan ng iba’t ibang makabago at mas malawak na paraan ng distribusyon. Tinututok nila ang kanilang mga proyekto at produksyon sa mga bagong pamamaraan ng pag-abot sa mga tao, kabilang na ang online streaming at iba pang digital platforms, bilang bahagi ng kanilang long-term na layunin sa industriya.

Sa ngayon, ang ABS-CBN ay patuloy na nagpupunyagi na maging makabago at maghatid ng makabuluhang mga programa na magsisilbing gabay at libangan sa mga Pilipino, sa kabila ng mga pagsubok at pagbabago sa industriya ng broadcast.