Pangangampanya Ni De Lima, Sinalubong Ng ‘Duterte Chant’ Sa Kanilang Pagbisita Sa Rizal

 Bumisita si dating Senadora Leila de Lima sa lalawigan ng Rizal noong Pebrero 16, 2025, bilang bahagi ng kanyang pagdalo sa Taytay HAMAKA Festival.

Kasama ang mga volunteer mula sa ML party list, kung saan isa siya sa mga nominado, naglakbay si De Lima sa Taytay upang makisalamuha sa mga tao at magpakita ng suporta sa kanyang kandidatura. Habang sila ay dumadaan sa ilang bahagi ng Taytay, sinalubong sila ng mga tagasuporta ng kanyang kalaban na si dating Pangulong Rodrigo Duterte, na sabay-sabay na nagbato ng "Duterte Chant" habang binabaybay nila ang kalsada.

Sa kabila ng mga sigawan, may ilang miyembro ng grupo ni De Lima ang nagbigay ng thumbs down na tanda bilang reaksyon sa mga Duterte supporters. Bagamat naroon ang tensyon, hindi ito naging hadlang kay De Lima upang ipagpatuloy ang kanyang kampanya. Ayon sa kanya, masaya siya at labis ang pasasalamat na muling mabigyan ng pagkakataon na makapagkampanya nang personal matapos ang ilang taon ng pagkakakulong.

"Three years ago, I missed the opportunity to campaign in person. Ngayon, sa halip na standee o tarpualin, narito ako at malayang lumalaban kasama ninyo. Dahil muli kong nakikita at nakakamayan, lalong tumitibay ang aking pag-asa para sa kinabukasan ng Pilipino," pahayag ni De Lima.

Ipinakita ni De Lima na kahit dumaan siya sa matinding pagsubok, gaya ng kanyang pagkakakulong, patuloy ang kanyang pag-asa at ang kanyang dedikasyon na magsilbi sa mga tao. Sa kanyang pagbabalik sa aktibong politika, pinapakita niyang hindi siya nawalan ng pag-asa para sa magandang kinabukasan ng bansa, at patuloy ang kanyang laban para sa mga prinsipyo na kanyang pinaniniwalaan.

Ang kanyang muling pakikilahok sa kampanya at ang personal niyang pakikisalamuha sa mga tao ay nagbigay inspirasyon at lakas sa mga tagasuporta ng ML party list, na patuloy na umaasa sa mga proyektong kanilang ipaglalaban. Sa kabila ng mga pagsubok, tinitingnan ni De Lima ang bawat pagkakataon na makakapanayam at makakasalamuha ang mga tao bilang isang mahalagang hakbang tungo sa pagtutok sa mga tunay na isyu ng bansa at pagpapabuti ng buhay ng bawat Pilipino.