PBBM May Mensahe Para Sa Mga Kabataan Sa Kanyang Talumpati

 Nagbigay ng mahalagang mensahe si Pangulong Ferdinand “Bongbong” Marcos Jr. sa mga kabataan tungkol sa pangangalaga at pagpapahalaga sa mga kaalaman na itinuro ng mga nakatatandang henerasyon. Ayon sa Pangulo, ang mga kabataan ang magsisilbing tagapagtanggol at magpapatuloy ng mga aral na ipinasa sa kanila ng mga nakaraang henerasyon.

Sa kanyang talumpati sa Inaugural Cash Gift Distribution sa mga kwalipikadong benepisyaryo ng Expanded Centenarians Act of 2024 noong Miyerkules, Pebrero 26, 2025, sinabi ni PBBM na napakahalaga ng papel ng kabataan sa pagpapatuloy ng mga tradisyon, kaalaman, at pagpapahalaga na itinuro sa kanila ng mga nakatatanda. 

“Para sa ating mga kabataan, kayo ang mag-aaruga sa magpapatuloy ng kaalamang itinuturo ng mga nauna sa atin,” pahayag ng Pangulo, na nagsusulong ng pagpapahalaga sa edukasyon at mga natutunan mula sa nakaraan.

Ayon pa kay PBBM, isang malaking responsibilidad ng kabataan ang gamitin ang mga kaalamang ito upang makapagbigay daan sa isang mas magaan at mas maliwanag na hinaharap para sa kanilang mga sarili at sa buong bansa. 

“Gamitin ninyo ito upang makapagbuo ng mas maliwanag na kinabukasan,” dagdag pa ng Pangulo, na patuloy na hinihikayat ang kabataan na maging proactive sa pagpapabuti ng kanilang kapakanan at ang kapakanan ng buong bansa.

Binigyang-diin din ng Pangulo ang kahalagahan ng pagpapakita ng malasakit at pag-aaruga sa mga nakatatanda, hindi lamang sa oras ng pangangailangan, kundi bilang isang responsibilidad ng bawat pamilyang Pilipino. Ibinahagi ni PBBM na ang mga pamilyang Pilipino ay nararapat magdiwang ng bawat sandali kasama ang kanilang mga nakatatanda, at ipakita ang paggalang at pag-aalaga sa mga ito. 

“Ipagdiwang ninyo ang bawat sandaling kapiling sila. Ipakita ninyo ang malasakit, dahil darating ang panahon na kayo din ang maghahanap ng respeto at kalinga mula sa inyong anak o apo,” aniya.

Ang mga pahayag ng Pangulo ay nagsisilbing paalala sa mga pamilyang Pilipino na mahalaga ang pagmamalasakit sa mga matatanda, dahil darating ang panahon na tayo rin ay aasa sa mga susunod na henerasyon para sa pag-aaruga at paggalang.

Samantala, inihayag din ni Pangulong Marcos ang inaasahang halaga ng kabuuang pondo na ipamamahagi ng gobyerno sa mga centenarians o mga senior citizens na umabot sa edad na 80, 85, 90, at 95. Ayon sa Pangulo, ang kabuuang budget na nakatakdang ipamahagi ay aabot sa ₱2.9 bilyon, na magiging bahagi ng kanilang benepisyo sa ilalim ng Expanded Centenarians Act of 2024. Ang batas na ito ay naglalayong magbigay ng cash gift at pagkilala sa mga senior citizens na umabot sa isang daang taon o higit pa, bilang pag-papahalaga sa kanilang mga kontribusyon sa lipunan.

Ang mga hakbang na ito ay nagpapakita ng dedikasyon ng administrasyon ni Pangulong Marcos sa pagpapabuti ng kalagayan ng mga senior citizens at ang pagpapahalaga sa mga nakatatanda. Tinutulungan din nito ang mga pamilyang Pilipino na magpatuloy sa pagpapakita ng pagmamahal, respeto, at malasakit sa mga elders, habang tinitiyak ang isang mas maayos na kinabukasan para sa kabataan.