FPRRD, Iginiit Na Ipinatupad Drug War Para Sa Mga Pinoy

 Matapos kumalat ang balita tungkol sa umano’y arrest warrant na ipinag-utos ng International Criminal Court (ICC) laban sa kanya, muling itinanggi ni dating Pangulong Rodrigo Duterte na siya ay may intensyon na “pumatay” at iginiit na ang madugong giyera kontra droga na isinagawa ng kanyang administrasyon ay para lamang sa kapakanan ng mga Pilipino.

Sa isang event na tinawag na "Pasasalamat kay PRRD" na ginanap sa Wan Cai, Hong Kong nitong Linggo, Marso 9, inamin ni Duterte na narinig niya ang mga balita ukol sa pagkakaroon umano ng arrest warrant laban sa kanya mula sa ICC.

"Ang balita ko, may warrant daw ako. Totoo. Sa ICC o kung ano man. Matagal na akong hinahabol ng mga put****ina," pahayag ni Duterte.

Kaugnay ng isyung ito, iginiit ng dating pangulo na hindi siya gumawa ng mga hakbang para sa kanyang pansariling kapakinabangan kundi para sa buong bansa, lalo na para sa mga Pilipino at kanilang mga pamilya.

“Okay ganito na lang, assuming na totoo, totoo talaga yung naririnig ninyo, bakit ko ginawa ‘yan? Para sa sarili ko? Para sa pamilya ko? Para sa inyo at ang inyong mga anak sa ating bayan,” dagdag pa ni Duterte.

Inamin din ni Duterte na bilang isang lider ng bansa, napilitan siya na harapin ang mga kasamaan at mga kriminal na nagdudulot ng takot at peligro sa mamamayan. Aniya, hindi naman siya nais maghasik ng karahasan o magpatuloy sa giyera kung hindi na-push siya ng sitwasyon na iyon.

"Tayong mga ayaw ng gulo, napipilitan tayo to confront evil because nandiyan sa harap natin. Sino ba namang gustong pumatay? Put****inang 'yan. Bakit ako mag—Why would I waste my time?" dagdag na pahayag ni Duterte.

Sa kabila ng kanyang mga paliwanag, patuloy na pinag-uusapan ang tungkol sa mga hakbang na isinagawa ng ICC, na nagsasagawa pa rin ng imbestigasyon tungkol sa umano’y mga paglabag sa karapatang pantao sa ilalim ng madugong giyera kontra droga ng administrasyon ni Duterte.

Samantala, binanggit din ni Presidential Communications Office (PCO) Undersecretary Claire Castro sa isang pahayag nitong Linggo na wala pang kumpirmasyon mula sa Malacañang patungkol sa isyu ng arrest warrant. Ayon kay Castro, wala pa silang natatanggap na opisyal na komunikasyon o dokumento mula sa ICC na nagpapatunay sa nasabing warrant.

Ang isyung ito ng arrest warrant laban kay Duterte ay patuloy na umaabot sa mga balita at mga usap-usapan, lalo na at patuloy na tinitingnan ng ICC ang mga posibleng kaso ng human rights violations na may kinalaman sa giyera kontra droga na ipinagpatuloy ng dating Pangulo. Ang isyung ito ay nagdulot ng mga magkakasalungat na reaksyon mula sa publiko, kabilang na ang mga taga-suporta ni Duterte na naniniwala sa kanyang layunin at mga kritiko na patuloy na nananawagan ng pananagutan para sa mga nangyaring paglabag sa karapatang pantao.

Kahit na patuloy ang mga isyung ito, pinanatili ni Duterte ang kanyang paninindigan na ang mga hakbang na ginawa niya noong siya ay nasa posisyon ay para sa kapakanan ng mga Pilipino at hindi para sa sariling interes.