VP Sara, Humingi Ng Pasensya Sa Nangyari Noong 2022 Elections

 Humingi ng paumanhin si Vice President Sara Duterte sa kanyang mga tagasuporta dahil umano'y nabudol sila ng ilan sa mga nakasama niyang tumakbo sa 2022 national elections.

Sa isang event na tinawag na “Pasasalamat kay PRRD” na ginanap sa Wan Cai, Hong Kong noong Linggo, Marso 9, ikino-kwento ni Duterte na may mga pagkakataong nilapitan siya ng ilang mga kababayan na nagsabing nabiktima sila ng scam dahil sa pagkakakampanya nila noong nakaraang eleksyon. 

Ayon kay Duterte, may isang lalaki pa raw na senior citizen na nagsabi sa kanya, “Sabi niya, alam mo, ‘na-scam’ kami dahil sa iyo. Lalaki po… senior ba? So sabi ko na lang, ‘Pasensya na, sir. Pasensya na.’”

Ipinahayag din ng Bise Presidente na noong mga panahong iyon, inisip niyang magtatagumpay sila sa ilalim ng platapormang “unity” at “continuity” na kanilang ipinaglalaban sa halalan. Ayon kay Duterte, akala niya na magkasama silang may layunin ng pagbabago at mas maayos na bayan para sa mga Pilipino. 

“Akala ko kasi, ito na naman tayo sa maling akala. Akala ko kasi, gusto niya ng mas magandang bayan, mas maayos na Pilipinas, kung ano yung pinagdaanan natin noon,” sabi ni Duterte. Hindi niya tinukoy ang pangalan ng mga kasamahan niyang tinutukoy sa kanyang pahayag.

Pinalawig pa ni Duterte na nang tumakbo siya noong 2022, ang kanilang kampanya ay nakatuon sa mga prinsipyong unity at continuity, at nais nila itong isakatuparan upang matulungan ang bansa na makamit ang mas magandang kalagayan. Ngunit sa huli, nalaman niya na siya rin ay “nabudol” ng mga nangyari. 

“Kasi, ang plataporma namin noong tumakbo kami, unity at continuity. Nabudol ako,” ani Duterte.

Matapos humingi ng paumanhin, ipinaabot ni Duterte ang kanyang pananaw na naniniwala siyang may dahilan ang lahat ng mga pangyayari. 

“Yun yung kailangan kong ihingi ng pasensya sa inyong lahat. Pero dahil sabi nga ni Pastor Quibuloy, dapat lang siguro mangyari ang mga nangyayari para makita natin. Kawawa lang siguro ang mga tao, ang bayan. Pero, if we talk about the divine, maybe there is a reason for what is happening,” sinabi ng Bise Presidente.

Si Duterte ay tumakbo noong 2022 elections bilang bahagi ng “UniTeam” na pinangunahan ni Pangulong Ferdinand “Bongbong” Marcos Jr. Siya ang naging running mate ni Marcos, at hanggang ngayon, patuloy silang nagiging bahagi ng administrasyong Marcos-Duterte. Kamakailan lamang, nagkaroon ng mga isyu at salungatan sa pagitan ng mga opisyal ng gobyerno at ilang miyembro ng UniTeam, at ito rin ang dahilan ng mga patutsada at hindi pagkakasunduan sa ilang pagkakataon.

Samantala, sa parehong pagtitipon sa Hong Kong, binanggit ni Duterte na tila iniwan na ng gobyerno ang kanyang opisina, ang Office of the Vice President (OVP), sa mga usaping nangangailangan ng tulong at aksyon. Ipinahayag niya ang kanyang kalungkutan sa pagkawala ng suportang tinanggap mula sa mga ahensya at tanggapan ng gobyerno, bagay na nagbigay ng alinlangan sa kung anong direksyon ang tatahakin ng kaniyang opisina sa mga susunod na taon.

Ang mga pahayag na ito ni Duterte ay nagbigay-liwanag sa kasalukuyang sitwasyon ng mga miyembro ng gobyerno, lalo na sa mga isyu hinggil sa mga proyekto at programa ng OVP. Sa kabila ng lahat ng ito, ipinagpatuloy pa rin ni Duterte ang paghingi ng paumanhin sa mga naganap at sinabing naniniwala siyang may dahilan ang lahat ng mga ito, bagaman masakit para sa mga apektadong kababayan.