Xyriel Manabat; 'Respeto Sa Sarili, 'Di Nasusukat Sa Piraso Ng Tela'

 

Isa sa mga pinakabagong housemates ng Pinoy Big Brother: Celebrity Collab Edition ang dating child star na si Xyriel Manabat, at sa kanyang pagpasok sa Bahay ni Kuya ay agad siyang nausisa tungkol sa mga maling akala ng publiko tungkol sa kanya.

Sa isang segment noong Martes, Abril 15, ginanap ang isang mock press conference para sa mga bagong pasok na housemates. Kasama ni Xyriel sa bagong batch ng housemates ang Kapuso Sparkle artist na si Shuvree Etrata. Dito, hinarap nila ang mga tanong ng naunang housemates na nagsilbing “media” sa naturang aktibidad.

Isa sa mga tanong na ibinato kay Xyriel ay kung ano ang palagay niyang “biggest misconception” o pinakakaraniwang maling akala ng mga tao tungkol sa kanya. Sa kanyang sagot, diretsahang nilinaw ng aktres na madalas siyang ma-misjudge dahil lamang sa paraan ng kanyang pananamit at pagpapahayag ng sarili.

Ani Xyriel, “Feeling ko, ang biggest misconception sa akin is just because of the way I dress or express myself sa pananamit. Feeling ng tao wala akong self-respect.”

Dagdag pa niya, “For me, hindi nasusukat ‘yong respeto ko sa sarili ko sa piraso ng tela. Para sa akin, kahit gaano ko ka-confident o kakomportable sa skin ko, hindi mo masasabi na hindi ko nirerespeto ang sarili ko.”

Matatandaan na noong Oktubre 2024, naging usap-usapan si Xyriel sa social media matapos niyang sagutin ang isang netizen na nang-body shame sa kanya sa isa niyang post. Matalim ang kanyang tugon sa naturang komento at ipinakita niyang hindi siya basta-basta magpapasindak sa ganitong uri ng pambabatikos.

Hindi rin ito ang unang pagkakataon na ipinaglaban niya ang kanyang karapatang ipahayag ang sarili. Sa isa pang social media post, tila tinamaan din ang ilang matatandang netizens na nagpapakita ng hindi kanais-nais na asal. Sa cryptic caption na kanyang ibinahagi, pinuna niya ang kabastusan ng ilan sa kabila ng kanilang edad—isang patutsada na umani ng suporta mula sa mga followers niya.

Ilang netizens ang nagpahayag ng paghanga sa pagiging matapang ni Xyriel sa pagtindig para sa kanyang sarili. Ayon sa kanila, hindi madali ang manatiling totoo sa sarili lalo na sa isang industriya na puno ng mapanuring mata at mapanghusgang pananaw. Ngunit sa kabila nito, nananatiling matatag si Xyriel sa kanyang prinsipyo.

Bilang dating child star na unang minahal ng mga manonood sa mga teleseryeng gaya ng 100 Days to Heaven at Momay, malinaw na si Xyriel ay hindi na lamang basta cute na batang artista. Lumalaban na rin siya ngayon sa mga mas seryosong isyu na kinahaharap ng mga kababaihan—kabilang na ang body shaming, slut shaming, at misogyny.

Para kay Xyriel, ang pagiging totoo sa sarili ay isang uri ng lakas na hindi nasusukat ng pananamit, hitsura, o opinyon ng ibang tao. At sa kanyang pananatili sa loob ng Bahay ni Kuya, tila ito ang isa sa mga adhikain niyang iparating sa kanyang mga kasamahan at sa mga nanonood—na ang paggalang sa sarili ay hindi kailanman dapat ikabit sa pananaw ng iba, kundi sa kung paano mo pinangangalagaan ang iyong dignidad bilang tao.